موقعه بور تعيس

يجي يوم الاربعاء1/2/2012 لأحياء ذكري موقعه الجمل 2/2/2011 والسيناريو الحقير مجزره بتحصل قصاد اعين الشرطه متلاقيش منهم غيير الفرجه و كمااان التصوير واللي يتحامي فيهم يجرو و يسيبوه اومااال انتا جاي و هازز المؤخره الشريفه عشان تعمل ايه يامخنس ...


طبعا كان باين من بيان الالتراس مصراوي ان هما من ناويين يعدو الماتش دا ع خير و اللي يجي يكتب وصيته قبل ما يروح الماتش ...

شهاده من فرد حضر مباراه :

أنا كنت في الإستاد في هذه اللحظات الكئيبة التي لن تغيب عن مخيلتي قط وأقدم شهادتي لله ثم للتاريخ
أنا كنت في الملعب حوالي الساعة 2 ونص كنت في المقصورة شمال خلف دكة الأهلي كان الحاضريين قليلين أوي لكن مع الوقت بدأت الأعداد تزيد شوية في شوية كانت هتافات جماهير المصري هي المسيطرة علي الملعب بشتائم أقذر ما تكون للنادي الأهلي وجماهيره بعد حوالي نزل فهيم عمر يسخن الجمهور قعد يحيه ويسقفله ويهذر معاه عاوزين بلانتي وتطردلنا منهم كام واحد ومع تزايد أعداد جماهير الأهلي والغياب التام للألتراس الأهلاوي بدأ الفريقين في إجراء الإحماء قبل الماتش أول ما نزل إكرامي مع الكابتن أحمد ناجي وبدأت الجماهير تستمهم هما الاتنين وتنادي علي اكرامي بكريمة وتشتم امه وابوه وهوه بيبتسم ومبيردش ولما بدأ يسخن الجماهير من مدرجات البحري اللي قدامنا قعدوا يضربوا عليه صواريخ راح هوه والكابتن ناجي يشتكوا لفهيم عمر لكن فهيم طنش تماما لغاية ما لعيبة الاهلي نزلت وبدأت الصواريخ تزيد بشكل فاضح في ظل المشاهدة الممتعة من فهيم عمر ولما راحله سيد عبد الحفيظ وحسام غالي قام مشاور للاعيبة الاهلي تعالوا احنا قلنا هيلغي الماتش والصراحة كان نفسنا لاننا كنا خايفين يحصل مجازر بدأ الأهلي يسخن مع لاعيبة المصري في النص بتاعهم قبل ما يرجعوا تاني بعد ما نزل مدير الأمن والحاج سيد علشان يهدوا الناس وقبل ما الماتش يبدأ علطول كانت جماهير الالتراس اهلاوي جاية في اوتوبيسات من قدام المقصورة قام جماهير المقصورة والغربي قعدوا يلقوهم بالطوب وردت عليهم جماهير الاهلي بشماريخ فبعض الجماهير من الغربي نزلولهم طبعا البوابات بتاعة الاستاد كلها كانت مقفولة بقالها ساعه تقريبا فجأة ملقيناش ولا اي حد امن علي البوابات والبوابات كلها كانت مفتوحة لاي حد يدخل او يدخل حاجة او يخرج وفجاه لقيت واحد بيقول الالتراس بيكسروا كل العربيات المنطقة الحرة طبعا كانت واسعة شوية قلتله طيب والعربيات الملاكي بيكسروها برضه قاللي لأ واحد من الجمهور كان قاعد ورايا نزل يطمن علي عربيته وطلع قاللي مفيش حاجة ومفيش عربيات اتكسرت ولا حاجةولما دخل الالتراس بتاع الاهلي بدأت الهتافات تزداد سخونة والحق يقال انا كنت بعيد عن المدرجات الاهلاوية فمكنتش سامع كويس هما بيقولوا ايه بدأ الماتش والشوط الأول بلا تجاوزات الا شتائم فقط وكام صاروخ انضربوا من مدرجات الغربي علي دكة الأهلي وقبل ما يخلص الشوط الأول كان بعض الجماهير بتنزل ارض الملعب والامن يطلعها وناس تبع الرابطة بتاعة المصري الشوط الاول خلص وبين الشوطين بدأت تجاوزات كتير طبعا غير ان في ناس من جماهير المصري كانت بتضرب شماريخ علي جماهير الأهلي من ورا مدرجاتهم وبقي في ناس كتير في الملعب والبوابات المؤدية للخارج بدون امن اطلاقا ومع بداية الشوط التاني بدأت العملية تزداد سخونة سباب وصواريخ وشماريخ واقتحامات للملعب تعدت الخمس مرات والمضحك عسكري بيقول للناس اللي بتتسلق السور والنبي علشان خاطري متنزلوش قبل ما الماتش يخلص بدقايق اتنين من جماهير الأهلي عدوا الكردون بتاع الامن ورميوا شماريخ علي جمهور المصري اللي قاعد في مدرجات البحري واول ما الماتش خلص فجأة اتفتحت البوابات المؤدية للملعب في مدرجات الغربي والبحري والشرقي في واحد كان في الغربي قاللي ان العساكر قالولهم انزلوا ربوا ولاد الكلب دول الملعب كان مدعكة وبكل حزن خرجت من الاستاد واول ما خرجت لقيت النور اطفي بتاع الاستاد وده علي فكرة بيعملوه كل ماتش علشان الجماهير تمشي وبره لقيت جماهير المصري محاصرة الملعب وواقفة عند جماهير الأهلي وبيلقوا عليهم طوب مسكت واحد بيرمي طوب قلتله يا اخي حرام عليكم قاللي وانت مال اهلك وقام ضربني في وشي والناس كانت هتهجم عليا فبعدت ناس كانت بترمي طوب يجي علي زمايلهم يفتح دماغهم كنت شايف ناس بتضرب ناس بالكراسي الحديد اللي العساكر كانوا قاعدين عليها نحية مدرجات الغربي كان جمهور الاهلي بيحاول يخرج من البوابة اللي نحية الشارع لكن جماهير المصري كانت ليهم بالمرصاد بالطوب ومنعوهم يخرجوا ده غير ان البوابة اصلا كانت مقفولة فسألت واحد جنبي بقوله هما نزلينلهم ليه قاللي اصل في ناس بتضرب بالمطاوي فوق كنت واقف برة هتجن مش عارف اعمل حاجة وفجأة سرت اشاعة ان في ناس ماتت من جمهور الاهلي ناس كتير كانت فرحانة وبتحتفل بالقتلي برة وناس كانت واقفة عند صنية السيد متولي بتعيط ومش عارفة تعمل ايه شوية ولقيت حاجت بتتحدف من فوق المدرجات بتاعة الأهلي بسأل واحد جنبي بقوله هوه ايه اللي بيتحدف من فوق ده لقيته بكل فرح وجذل بيقولي بيحدفوهم من فوق المدرجات كنت هاعيط وقلت بدل ما اموته سيبته ومشيت وبدأت سرينات الاسعاف تنطلق وعربيات رايحة جاية وكل شوية واحد شايلينوه وواخدينه علي المستشفي بدأت بعسكري وبعد كده كلهم مشجعين اهلي شوية ولقينا ناس خارجة ماسكة هدوم الجماهير والبانرات وبيتصوروا بيها فبسأل واحد بقوله انتوا جايبين الهدوم دي منين قاللي قلعناهم هدومهم وكلهم - لا مؤاخذة في اللفظ - بالبوكسر بعد شوية سمعنا صوت ضرب رشاشات أو آلي مش عارف وكان في نور بينور تحت مدرجات الاهلي ساعة الضرب بس مش عارفين مين كان بيضرب علي مين
==================================================
مشاهد لا يمكن أن أنساها
* واحد من جمهور الأهلي يحتضن أخاه الميت في حضنه وبيصرخ ويقول أخويا اخويا وشوية كلاب قاعدين يضربوه بالشلاليت هوه وأخوه وواحد من جمهور المصري بيدافع عنه انضرب لحد ما واحد من جماهير المصري طلع مطواة وقاللهم اللي هيقرب منهم هاضربه
* عيل حوالي 10 سنين نط من فوق السور وواحد صرخ اهلاوي اهلاوي طلع يجري والناس تجري وراه مسكوه هروه ضرب لحد ما رحت مع واحد صاحبي خلصناه من ايديهم بعد ما انضربنا طبعا
* واحد قعد يحلفلهم ويقولهم انا بورسعيدي ومكنتش لاقي تذكرة ودخلت مع جمهور الاهلي وادي بطاقتي ولكن لا حياة لمن تنادي
* جماهير الاهلي تتوسل للي بيضربوهم نبوس رجليكم احنا ملناش دعوة احنا اسفين حقكم علينا ولكن ولا اللي بيدن في مالطة
* طوابير للتبرع بالدم ادام كل مراكز الدم والمستشفيات
* موتسيكلات وعربيات البورسعيدية بتنقل المصابين من جماهير الاهلي للمستشفي في ظل العدد الغير كافي لعربيات الاسعاف
* اتنين من السويس كانوا مع جماهير الأهلي اتعوروا خدناهم وراضيناهم وعشناهم ووصلناهم للموقف واحد فيهم بيقول مش دول البورسعيدية ابدا البورسعيدية ميعملوش فينا كده دا انا كنت طالع من الملعب بالبوكسر وواحد خدني البيت عنده وجابلي هدوم وحلف عليا ابات عنده بس انا اللي مرضيتش والتاني بيقول انا اتشهدت وكنت هاموت
* عند المستشفي العسكري كان في شوية شباب بيحكوا عن زميلهم من السويس عنده 15 سنة وامه حلفت عليه لو راح الماتش ميدخلش البيت وهيه عماله تتصل بيهم ومش عارفين يردوا عليها يقولولها ان ابنها مات ازاي
* واحد صاحبي بيقوللي احسن علشان يتربوا " لا تعليق "

===================================================================================

دي كانت الشهاده..

احنا عارفين ان جمهور بورسعيد اوسخ جماهير في تاريخ الكوره المصريه بس عمري ماكنت اتخيل الوساخه توصل لكدا لو افترضنا ان الشهاده دي صحيحه برغم ان بشاعه الكلام و الوصف عقلي مصدقه و قلبي بيقولي لأ مش ممكن اكيييد مش دا الجمهور اكيد بلطجيه اندسو جواهم و بالتالي الجمهور ممكن يكون اتورط و اشترك في الاحدااث بس حتي لو كانو ناويين ع شغب ففي ناس بلغت مدير الامن قبلها ان في مشاغبات هتحصل ! عمل هوا اييه !!ازاي ميأمنش ماتش في الاهميه دي وبين اكتر جمهورين بيكرهوا بعض ...التفسير الوحيد انهم كانو عارفين ان دا هيحصل قالو ندس جواهم بالمره بلطجيه يسخنو الامور و اهي في الاخر تتلبس للجمهور بس !


انا شوفت الاحداااث دي كلها و اتصدمت  اما رجعت لاني كنت ساعتها في ستاد القاهره في ماتش الزمالك و الاسماعيلي وانا وكل الزملكاويه اللي في الاستاد بنسمع الاخباااار و مش مصدقيين فاكرين الناس بتبالغ فاكرينهم بيبالغو وهما بيقلولنا ان الا عداد اللي ماتت اربعه كلها ربع ساعه ع بال ما خرجت من الاستاد و ركبت الاقيهم 70 و لسه المجزره شغاااله ساعتها الالتراس ولعو في الدخله بتاعتهم اعتراض و تضامن مع الاحداث اللي بتحصل مش بيولعو في الاستاد و لا اي حاجه من الهري اللي اتقال

...

رجعت البيت بعيدا عن كم القلق اللي أمي كانت فيه و اني اتمنعت من الخروج بسبب اني كنت رايحه الاستاد لوحدي من غير اي حد معايا  فتحت التليفزيون بتفرج و انا مصدومه 74 مااتو ؟ بجد ؟ عشااان اييه !! ايه في الدنيا يستاهل ان 74 يموتو عشانه عشااان شويه عوااجيز !!نفسي احط نفسي مكان مبارك و طنطاوي و افكر بطرقه تفكيرهم و احس باحساسهم !! عشان اييه كل الشباب اللي زي الورد دااا يموت !! دا انتا خلااااص رجل جوه و رجل بره ملقتش مبرر غير ان السفاح اما بيقتل مبيهموش بيموت ميين و ليه هوا عايز يموت و خلاص...!




حاجات مطلوب تفسيرها ياشرفاء يالحاسين البياده:

لم يحضرمحافظ بورسعيد المباراة لأول مرة في تاريخ لقاءات
الأهلي و المصري.
٢_المذيعين اللي ضد الثورة بيطالبوا بإعادة قانون الطوارئ.
٣_الناس نزلت تجري ورا اللاعيبة و الجمهور العادي فضل قاعد في مكانه
(أعتقد ان الجنود و ضباط الشرطة مش لازم يلبسوا البدلة الميري علشان نعرفهم!).
٤_إطفاء أنوار الإستاد و إختفاء عربيات الإسعاف والأمن بيحمي النجيلة.
٥_نادر السيد: وزير الداخلية مش راضي يرد عليا.. ياتري ليه؟.
٦_مين من مصلحته يعمل فوضي علشان يثبت ان البلد بتولع.
٧_المسؤلين فين؟.
٨_من امتي و الأمن بتاعنا بيسكت لأعمال الشغب؟
ولا هو القوة بتظهر في ميدان التحرير بس!.
٩_ليه معظم اللي ماتوا من ألتراس أهلاوي اللي بينزلوا في المظاهرات.
10- ابتسامة رجال الامن في وش الناس اللي نازلة الملعب

 

محتاجه اجابات ! لو لقيت حاجه غير الاوساااخ العسكر ورا اللي حصل اقنعني بيها لو سمحت ..

 

 أييييه حجم الكارثه اللي مستنينها تحصل عشان يطلعو يقولو احنا فشلنا احنا فشله و يرجعو ثكانتهم و يسلمو السلطه للمدنين..
بعد كل دا يطلع طنطاوي يقول دا بيحصل عااادي في كل حته و اللي ماتو دول ماتو بايد مصريين فلازم المواطنين الشرفاااء ميسكتوش و يقفو ضددهم ,واحنا كل حاجه ماشيه زي ما احنا مخططينلها بالظبط ! طب ما طبعا دا اللي انتو مخططينلو ياكلاب بتنتقمو من الالتراااس عشااان و قفو في وش ظلمكو و طالب برقابيكو ! انتو كدا خوفتوهم ياكلاب ! ازاي مش قادرين تستوعبو لحد دلوقتي ان الناس قلبها ماااات و مبقتش تيجي بطريقه سيدك مبارك دي !!


دلوقتي يطلعلك واحد من المواطنين الشرفاااء و يقولك و اييه اللي وداهم الاستاد !! ونبي لتقولوها !!او يطلع يقولك كفااايه فوضي و اعتصامات و مظااهرات لحد كدااا الناس اللي ماتت و بتموت دي بتموت بسببكو و حقهم في رقابيكو خربتو البلد ! طبعا كل الكلام دا يترد عليه بحركه ابيحه مش هاقدر اعملها للأسف..


في نفس الوقت انا بنت مش باايدي حاجه غير اني انزل بكره في مسيره !!اعمل اييه طيب و عليا النعمه لاعملو ! اوسخ احساااس في الدنيا احسااااسك بالعجز  انتا شايف اخوك ميت و اللي قتله قداامك و مش عارف تقتله !! احساس ولا اوسخ بجد ..بس اللي اعرفه ان الموضوع داا لو عدا و الجو هدي من زي قبله من غير مايحصل اللي عايزينه يبقي عليه العوض.... 


المهم سيبكم من الرغي داا كله انا بس بفضفض عشااان هطرشق الخلاصه يعني عايزه اقولكو
....


>>>>>>>>>>>>>>>>>>يسقط يسقط حكم العسكر.<<<<<<<<<<<<<<<<<<<<<<<